Tababaraha xulka Spain Vincente del Bosque ayaa shaaca ka qaaday inuu ku soo shirtagi doono
seddex weeraryahan bilowga finalka maanta ee Euro 2012 ee ay la ciyaarayaan
xulka Italy.

 61 jirkaan ayaa ku soo galay qaabab kala duwan intii uu socday tartankaan, isagoo
Cesc Fabregas u isticmaalay 9 been ah, halka sidoo kale uu weerar ahaan u
isticmaalay Fernando Torres iyo Alvaro Negredo.

 Ciyaaryahanka khadka dhexe ee Barcelona ayaa ku soo bilowday kulankii wareega group-yada ee
Italy, lakiin Bosque ayaa si maldahan u sheegay in 25 jirkaan uu kursiga keydka
ku bilaaban doono kulanka maanta.

 “Waxaan goor horeba go’aansanay lin-upkeena kulanka berri [maanta]” ayuu Del Bosque u
sheegay Deportes
Cuatro. “Waxaan ku soo geli doonaa seddex weeraryahan”.

 Kulanka maanta ayaa waxa uu yahay finalkii seddexaad ee ay Spain ciyaarto muddo afar
sanno gudaheed ah, lakiin Del Bosque ayaa sheegay in suurtagalnimada ay Spain ku
noqoneyso xulkii ugu horeeyay ee seddex koob oo waa weyn oo isku xiga qaada
inaysan cadaadis badan dul saareynin wiilashiisa.

 “Wax micno ah ma soo kordhineyso in loo sheego ragaan sida ciyaartaan ay muhim u
tahay, mar hadiiba ay ciyaaro muhim ah soo ciyaarayeen mar walba” ayuu
hadalkiisa raaciyay.

 “Runta waxa ay tahay waxa ay wakiil ka yihiin wadanka oo dhan, waxaana jira dalab weyn
oo laga doonayo”.

Kabtanka xulka Italy Gianluigi Buffon ayaa sheegay in horyaalka Premier League uu
dhaawacayo xulka qaranka Three Lions.

 Ka hor finalka Euro 2012 ee ay xulkiisa la ciyaarayaan Spain, Buffon ayaa aaminsan
in ajaaniibta ka ciyaarta Premier League inay qarisay tayadii ciyaartoy u
dhalatay England. Manchester City, Chelsea iyo Arsenal ayaa si gaar ah loogu
eedeeyaa inay doortaan xiddigo aan Ingariis aheyn, waxaana Buffon oo 34 jir ah
uu sheegay in Premier League uu yahay horyaalka ugu fiican adduunka lakiin ay
saameyn ku yeelatay abaarta koobabka ka heysa England muddo 46 sanno ah.

 “Inaad heysato horyaal xamaasad leh micnaheeda ma ahan inaad heysato ciyaartoy tayo
leh” ayuu yiri.

 “Muddo sannado ah, horyaalka Ingariiska waxa uu ahaa horyaalka ugu fiican marka ay
timaado dhanka tayada”.

 “Lacagta taala horyaalka ayaa waxa ay la micno tahay in kooxaha ay soo iibsan karaan
xiddigaha yurub ugu qatarsan ama kuwa adduunka dacaladiisa jooga”.

 “Tani xitaa waa ku dhici kartaa Spain ama Italy sidoo kale, lakiin horyaalka England
faa’ido uma keeno xulka qaranka”

 “Iyadoo la marayo xilligan casriga ah, waa adag tahay. Waxaad ku dhibtooneysaa inaad
heysato ciyaartoy wadankaaga ah oo ka ciyaarta horyaalka ugu sareeya
wadankaaga”.

Kooxda Botafogo ayaa la soo wareegtay ciyaaryahan Clarence Seedorf kaasoo qalinka
ku duugay heshiis labo sanno ah sida ay xaqiijisay kooxda reer Brazil.

 36 jirkaan ayaa muddo dheer lala xiriirinayay inuu u dhaqaaqayo South America ka
dib markii uu dhacay qandaraaskiisa AC Milan.

 Si kastaba, bilo la iska dhexmarayay mustaqbalkiisa, iyo isagoo BBC kala
shaqeynayay falanqeynta ciyaaraha Euro 2012, waxa uu haatan ku biiray kooxda ka
dhisan Rio de Janeiro, isagoo u ciyaari doona labada xilli ciyaareed ee soo
socota.

 Warbixin la soo dhigay website-ka kooxda ayaa lagu yiri: “Botafogo waxa ay dhameystirtay
la soo wareegitaankii 36 jirka reer Holland Clarence Seedorf”.

 “Waxa uu saxiixay heshiis labo sanno ah oo uu kula joogayo Botafogo. Waa saxiixii ugu
weynaa ee ciyaaryahan ajnabi ah ay sameyso koox Brazil ah” ayuu lagu yiri
warbixintaas.

 Seedorf, ayaa 10 sanadood ku qaatay Milan, isagoo ku guuleystay labo Serie A iyo labo
Champions League intii uu joogay Rossoneri.

Waxaa galabta gudaha Magaalada Buuhoodle lagu soo gaba gabeeyey koob lagu xusayey 1
luulyo oo ah maalintii ay midoobeen gobolada waqooyiga iyo koonfureed ee dalka
soomaaliya, isla mar ahaan taana ay si wada jir ah u wada dhisteen Jamhuuriyada
Soomaaliya.


Koobkani oo ay kasoo qayb galeen Madax ka tirsan Maamulka khaatumo oo uu hor kacayo
madaxweyne Maxamed Yuusuf Jaamac Halac (Indha Sheel) qaar kamid ah golaha
wasiirada maamulka khaatumo, Agaasimayaal, Iyo Waliba taageer aad u tira badan
oo kala taabac san Labadan kooxood ee galabta ciyaarta kama dambaystaa ay ku
dhexmartay garoonka kubada cagta ee magaalada buuhoodle.


Labada kooxood ee iskugu soo hadhay ciyaartan kala dambaystaa oo lagu kala magacaabo
Hilaal Iyo Togsool, iyadoona ciyaarta dhex martay labadan kooxood ay ahayd mid
shidan oo ugu dambayntii kusoo gaba gabootay Riigoolayaal, isla mar ahaan taan
ay guushu halkaasi ku raacday kooxda Togsool oo iyadu halkaasi ku hanatay
koobkaasi.


koobkan oo ay ka qayb qaateen ilaa Lix kooxood oo ka jira gudaha magaalada buuhoodle ee
xarunta g.cayn ayaa waxaa soo qaban qaabiyey jaaliyada khaatumo state, isagoona
koobkani ahaa mid lagu dhiiri galinayey dhalinta sport-ga ah isla mar ahaan
taana si weyn loogu xusayo maalinta mudnaan ta leh ee 1 luulyo.


Hadaba waxaa ugu horaynba halkaasi ka hadlay Agaasimaha guud ee wasaarada arimaha
bulshada Xasan Cali Aw Yuusuf  isagoona ku amaanaya bulshada reer buuhoodle
dhiiri galinta iyo dadaalada ay la garab socdaan dhalinyarada sport-ga iyo xuska
maalinta 1 luulyo oo ah maalin qiimi mudan kuna dheer qalbiyada umada
soomaaliyeed.
Sidoo kale waxaa isna halkaasi ka hadlay Agaasimaha Wasaarada
Arimaha Gudaha Maxamuud Sheekh Cumar Xasan oo ku qoto dheeray muhiimada ay
leedahay xuska maalinta 1luulyo isagoona kula dar daarmay jaaliyada khaatumo
meelkasta oo ay ku sugan tahay inay ka qayb qaataan xuska maalinta 1 luulyo oo
ah maalin si weyn loo xusuusto.


Waxaa sidoo kale isna halkaasi ka hadlay C/rixiin Saleebaan Faarax oo kamid ah
dhalinyarada sport-ga ahna kamid ah qaban qaabiyaashii koobkani isagoona guul
wacan u rajeeyey kooxihii garoonka kubada cagta ee magaalada buuhoodle ay maanta
ciyaartu ku dhex martay iyo waliba kuwii ku hadhay wareegyadii hore.


Ugu dambayntii ayaa waxaa koobkani soo gaba gabeeyey Madaxweynaha maamulka Khaatumo
state Maxamed Yuusuf Jaamac  Halac (Indha sheel)  oo gudoonsiiyey
dhalinyaradii ka qayb gashay koobkani abaal mariyo kala duwan isla mar ahaan
taana si weyn u soo dhaweeyey xuska maalinta 1 luulyo.
Koobkani ayaa kusoo
beegmaya xili si weyn guud ahaan dalka gudihiisa iyo debadiisaba ay ka jiraan is
baabul damaashaadyo lagu soo dhaweynayo xuska maalinta 1 luulyo oo ah maalin si
weyn ugu qoto dheer quluubta umada soomaaliyeed.



Abdirahman
wadani 


Email axmedyare1001@hotmail.com


Buuhoodle
Khaatumo State

Sevilla ayaa ku dhawaaqday in weeraryahan Frederic Kanoute inuu ka tagay kooxda isagoo ku
biiray kooxda horyaalka China ee Beijing Guoan.

 Xiddiga reer Mali ayaa bilowgii todobaadkan sheegay inuu ka fiirsanayo halka uu u
hayaamo, hadii ay ahaan laheyd bariga dhexe, China iyo Mareykanka.

 Waxaana uu haatan heshiis labo sanno ah u saxiixay kooxda ka dhisan caasimada China,
kuwaasoo kaalinta 3aad kaga jira horyaalkooda, waxaana ay 7 dhibcood ka
danbeeyaan kooxda Guangzhou Evergrande.

 Kanoute ayaa u saxiixay Sevilla 2005tii ka dib labo sanno oo uu la joogay Tottenham,
waxaana uu halyeey ka noqday kooxda Ramon Sanchez Pizjuan, isagoo dhaliyay 136
gool 290 kulan oo uu saftay.

 Intii uu joogay Spain, ciyaaryahankii ku guuleystay laacibka sannadka Afrika 2007dii
ayaa ka caawiyay Sevilla inay qaado labo Uefa Cup, hal Uefa Super Cup, labo Copa
del Rey iyo hal Spanish Supercopa.

Madaxweynaha UEFA Michel Platini ayaa shaaca ka qaaday in Euro 2020 in laga yaabo in 12
magaalo oo qaarada yurub ah in lagu qabto koobka.


Turkey ayaa ugu cadcad inay martigeliyaan koobka Euro 2020, lakiin u tartankooda
martigelinta ayaa waxa ay kala kulmeen dhib madaama sidoo kale Istanbul ay
dooneyso in isla sannadkaas ay martigeliyaan ciyaaraha Olimbikada adduunka.

 Waxaana Platini uu xaqiijiyay in qorshe kale ay ka fekerayaan, iyadoo laga yaabo in
koobka ay martigeliyaan wax ka badan hal ama labo wadan.

 “Koobka Euro 2020 waxaa laga yaabaa in lagu qabto Europe oo dhan” ayuu yiri Platini.

 “Waxa ay noqon kartaa hal wadan iyo 12 garoon ama hal garoon iyo 12 ama 13
magaalo”.

 Platini ayaa xaqiijiyay in go’aanka ugu danbeeya la qaadan doono Janaayo ama Febraayo
sannadka soo socda.

Saxaafada Ingariiska ee dhanka Isboortiga ah oo tan ugu afka dheer caalamka ayaa inta
badan waxa ay ka hadlaan wararka xanta ah ee la isla dhexmarayo suuqa kala
iibsiga ciyaartoyda.


Maanta waxaan soo qaadan doonaa wararkii ugu waa weyn ee ay ka qoreen suuqa kala
iibsiga:


Manchester United ayaa sarre u qaadeysa dadaalkoodii ay ku doonayeen inay ku soo xero
geliyaan daafaca kooxda Everton Leighton Baines, iyadoo tababare Sir Alex
Ferguson uu doonaya inuu soo iibsado ka hor inta aysan kooxda u ambabixin
socdaalkeeda ay xilli ciyaareedka cusub isagu diyaarineyso. Sidaasi waxaa qortay
Daily Mirror.


Chelsea ayaa u muuqata mid Real Madrid ku garaaceysa dalabka 26 jirka Tottenham Luka
Modric,iyagoo isku diyaarinaya inay ku dalbadaan ciyaaryahanka khadka dhexe 36
milyan ginni. Sidaasi waxaa qortay The Daily Express.


Tababaraha Liverpool Brendan Rodgers ayaa isha ku haaya inuu 6 milyan ginni kula soo
wareego xiddiga Bolton Mark Davies, ka dib markii uu ku guuldareystay saxiixa
Gylfi Sigurdsson. Sidaasi waxaa qortay Daily Mirror.


Todobaadkan ayaa la filayaa in 23 jirka Spurs Giovani Dos Santos, inuu ka tago White Hart
Lane oo uu ku biro midkood Sevilla ama Atletico Madrid. Sidaasi waxaa qortay The
Guardian.

 Kolo Toure ayaa ku dhow inuu u dhaqaaqo kooxda Turkiga ee Bursaspor ka dib markii ay
Manchester City ay ogolaatay inay dhageysato dalabyada u imaanaya kabtankii
hore. Sidaasi waxaa qortay Daily Mirror.

 Ezequiel Lavezzi ayaa iska diiday Manchester City isagoo ka doorbiday Paris Saint
Germain. 27 jirkaan kooxda Napoli ayaa ku dhow inuu ogolaado heshiis 21 milyan
ginni uu ugu wareegayo kooxda ka dhisan caasimada Faransiiska. Sidaasi waxaa
daabacday The Sun.

 Ibrahim Afellay� ayaa
diyaar u ah inuu Barcelona kala hadlo mustaqbalkiisa, iyadoo Tottenham iyo
Liverpool ay si aayar ah u la socdaan xaalada 26 jirkaas. Sidaasi waxaa qortay
talkSPORT.

 Tottenham ayaa ku dhow inay u dhaqaaqdo daafaca garabka ka ciyaara ee kooxda FC Porto
Alvaro Pereira, taasoo shaki gelineysa mustaqbalka ciyaaryahan Benoit
Assou-Ekotto. Sidaasi waxaa qortay Daily Mirror.


Intaas ayaa ugu waa weyn wararka suuqa kala iibsiga ku aadan ee ay qoreen saxaafada
Ingariiska maanta, 1da bisha July waxaan bilaabi doonaa barnaamijkeenii
Wargeysyada Yurub iyo Suuqa Kala Iibsiga oo aan maalin walba kaga hadli doono
wararkii ugu danbeeyay ee suuqa kala iibsiga ee Ingariiska, Talyaaniga, Spain
iyo Jarmalka.

Cesc Fabregas ayaa qirtay in Spain ay u baahnaan doonto inay fiiro gaar ah u
muujiyaan Mario Balotelli marka ay finalka Euro 2012 kula kulmayaan xulka
Italy.

 Weeraryahanka Manchester City ayaa meeshiisii ugu sareysay gaaray habeenkii khamiista
markaasoo Azzurri ay 2-1 ku dardartay xulka Jarmalka, Balotelli ayaana dhaliyay
labada gool ee guusha u sahashay xulka Talyaaniga.

 Fabregas ayaase sheegay in weeraryahankaasi oo isha ku haaya kabaha dahabka in loo
baahnaan doono in il gaar ah loo yeesho hadii ay Spain dooneyso inay difaacdaan
koobka qaramada yurub.

 “Balotelli waa ciyaaryahan weyn” ayuu yiri ciyaaryahanka khadka dhexe ee Barcelona.

 “Waxa uu taasi soo bandhigay shalayto [khamiistii] isagoo dhaliyay labo gool oo cajiib
ah, oo uu ka dhaliyay semi-finalka xul aad u xoog badan sida Jarmalka”.

 “Waxa uu noqon doonaa halis, sida Cassano iyo weeraryahanada kale”..

Labada goolhaye ee ugu sareeya caalamka Iker Casillas iyo Gianluigi Buffon ayaa isaga
horimaan doono finalka Euro 2012, sidaasi darteed waxaan eegi doonaa sida labada
nin ay koobabka caalamiga ah uga soo muuqdeen Spain iyo Italy.


Kaliya looma texgeliyo inay yihiin goolhayayaasha ugu fiican waqtigan casriga ee kubada
cagta, lakiin sidoo kale dad badan ayaa aaminsan in Buffon iyo Casillas ay ka
mid yihiin goolhayayaashii ugu fiicnaa ee abid soo maray caalamka.


Labada goolhaye waxa ay ku guuleysteen koob adduun, iyadoo Casillas uu sidoo kale ku
guuleystay koobka qaramada yurub, inkastoo Buffon uu final ka gaaray koobkaas
islamarkaana laga qaaday sannadii 2000.


Labada goolhaye waxa ay koobab la qaadeen kooxahooda Madrid iyo Juventus, waana kooxo
ay u ciyaarayeen muddo ka badan 10 sannadood.


Lakiin sidee ayay ku yihiin koobabka caalamiga ah? Waxaan isbarbardhigi doonaa
rikooradooda koobabka Euro 2004, World Cup 2006, Euro 2008 iyo koobkaan haatan
Euro 2012. Waxaan u xulanay koobabkan ayaa ah in labada goolhayeba ay koobabkan
ka ahaayeen goolhayayaasha koowaad ee xulalkooda.


Guud ahaan Casillas waxa uu u saftay Spain 136 kulan, halka Gigi Buffon uu u saftay
Italy 119 kulan, Casillas labo koob oo waa weyn ayuu xulkiisa la qaaday halka
Buffon uu hal koob oo weyn uu la qaaday Azzurri.


Koobabka aan sheegnay ee aan kor ku xusnay ee ay labada goolhaye ka ahaayeen
goolhayayaasha koowaad waxa uu Casillas saftay 16 kulan, halka Buffon uu saftay
19 kulan.

 Isla koobabkaas aan kor xusnay Casillas waxaa laga dhaliyay sagaal gool, halka Buffon
laga dhaliyay 11 gool.


Isla koobabkaas aan kor ku soo xusnay, Casillas waxa uu shabaqiisa gool ka ilaaliyay
sagaal kulan, halka Buffon uu shabaqiisa gool ka ilaaliyay 10 kulan.


Isla koobabkaas aan kor ku soo xusnay Casillas waxa uu badbaadiyay 79.5% shuudadkii
lagu soo tuuray, halka Buffon uu badbaadiyay 86.6% shuudadkii lagu soo
tuuray.


Waxa cad ayaa ah in labadaan goolhaye ay yihiin kuwa aad u fiican, islamarkaana isa
soo saari kara ciyaaraha waa weyn ee ay wajahaan.


Sida ay u ciyaaraan finalka ayaana qeyb libaax leh ka qaadan doonta rajada xulkooda,
lakiin waxaan filan karnaa in midkoodna uusan guuldarro gacmahiisa ugu soo jiidi
doonin wadankiisa.


 

Weerarahanka Talyaaniga Mario Balotelli ayaa haatan u muuqda inuu wadada u saaran yahay inuu
qaato kabaha dahabka Euro 2012, ka dib markii uu labo gool ka dhaliyay Germany
habeenkii khamiista taasoo sababtay in ninkii ugu dhawaa ee la tartamayay Mario
Gomez uu daaqa ka baxo.


Ilaa iyo afar ciyaartoy kale ayaa la wadaagtay Mario Balotelli min seddex gool,
lakiin afartaasi kale waa ay ka hareen tartanka Euro 2012.

 Si kastaba, Balotelli ayaa leh fursad uu haatan kaga fogaado ciyaartoyda kale ee ay
isku goolasha yihiin marka axada ay finalka wada ciyaaraan xulka Spain.

 Dhanka xulka La Roja seddex ka mid ah ciyaartoyda Vincente del Bosque ayaa iyagana rajo
ka qaba inay qaataan kabaha dahahbka Euro 2o12, iyadoo Fernando Torres, Cesc
Fabregas iyo Xabi Alonso ay dhamaantood shabaqa soo taabteen min labo jeer.

 Labo ka mid ah saaxiibada Balotelli ayaa iyagana fursad meel dheer ah leh, iyadoo
Andrea Pirlo iyo Antonio Di Natale ay labadoodaba dhaliyeen min gool.

 Hadii min seddex gool lagu dhameysto tartanka abaalmarinta waxa ay aadi doontaa
ciyaaryahanka  ugu caawinta badan goolasha, hadii taas isku mid laga
noqdana waxaa lagu kala saari doonaa ciyaaryahanka ciyaaray daqiiqadaha ugu yar
ee tartankaan.

 Sidaasi darteed, yaad u maleyneysaa in loo caleemo saari doono gooldhaliyaha koobka Euro
2012?