Masraxa waxa uu u diyaarsan yahay xulka shanta jeer ku guuleystay Koobka Adduunka iyo xulka difaacanaya Koobka Adduunka oo ku sagaalami doona koobka Confederations Cup ee caawa finalkiisa uu ka dhacayo Rio de Janeiro iyo mid ka mid ah garoomada ugu caansan caalamka Maracana.

Bazil iyo Spain ayaa kulmay kaliya hal jeer 23kii sanno ee ugu danbeysay, waxaana markii ugu danbeysay ay ku kala baxeen barbaro goolal la’aan ah madaama ay aheyd ciyaar saaxiibtinimo laakiin markaan waa qasab in xul ka mid ah labadan xul dhinaca dhulka loo dhigi doono.

LINE-UPKA MACQUULKA AH:

Brazil (4-2-3-1): Cesar; Alves, Silva, Luiz, Marcelo; Paulinho, Gustavo; Hulk, Oscar, Neymar; Fred.

Spain(4-3-3): Casillas; Arbeloa, Pique, Ramos, Alba; Xavi, Busquets, Fabregas; Pedro, Soldado, Iniesta.

Tababaraha Brazil Luiz Felipe Scolari ayaa sheegay inuusan wax dhaawac ah qabin waxaana laga yaabaa in line-up aan la bedelin uu kaga hortago caawa xulka Spain.

• Kulanka: Brazil v Spain
• Garoonka: Maracana
• Waqtiga: kowda habeenimo Saacada Geeska Africa

Hulk waxa uu ku guuldareystay inuu shabaqa soo taabto sagaalkiisii kulan ee ugu danbeysay ee kulan heer caalami ah, taasoo la micno ah inuu tartan booskiisa ah kala kulmi doono Bernard ama Lucas Moura.
Labada ciyaaryahan ee reer Spain Roberto Soldado iyo Cesc Fabregas ayaa seegay semi-finalkii ay la ciyaareen Italy sababo la xiriira dhaawacyo yaryar oo ay qabeen.

Si kastaba, labada ciyaaryahan ayay u badan tahay inay ka horimaan doonaan Brazil caawa.

Andriy Shevchenko ayaa kula taliyay Cristiano Ronaldo inuu baaqi ku sii ahaado Real Madrid, isagoo u sheegay in loo ciyaaro Los Blancos inay tahay meesha ugu sareysa ee ciyaaryahan kasta uu gaari karo.

Waxaa la soo warinayay in xiddiga reer Portugal uu ka fiirsanayo inuu ku laabto Man United, laakiin Shevchenko ayaa aaminsan in 28 jirkaan ay doqonimo ku noqon doonto hadii uu ka tago Madrid.

“Ma aqaano sababta uu Cristaino u doonayo inuu baxo” ayuu xiddigii hore ee AC Milan u sheegay jariirada AS.

“Marka aad joogta Madrid, waa qasab inaad ku negaato Madrid.

“Dhamaanteen waan jecleyn inaan halkaas ka ciyaarno. Meel kale oo ka sareysa oo mustaqbalkaaga ciyaareed ah oo la aado ma jirto.”

Shevchenko ayaa sheegay in Ronaldo ay u fiicnaan laheyd inuu sii joogo Bernabeu si uu fursad ugu helo inuu la shaqeeyo tababaraha cusub Carlo Ancelotti, kaasoo xiddiga reer Ukraine uu ka soo hoos ciyaaray markii uu joogay San Siro.





“Waan hubaa in Ancelotti uu saaxiib la noqon doono dhamaan ciyaartoyda kaliya ma ahan Ronaldo, qof walbana waa uu u furi doonaa qolka labiska.” ayuu hadalkiisa raaciyay.

“Waxa uu isku shaandheyn doonaa Real laakiin si wanaagsan, sida hawo cusub oo soo gashay oo kale. Waan hubaa inuu doonayo inuu ka dhaadhiciyo Cristiano inuu joogo.”

Cesc Fabregas ayaa sheegay inay tahay wax aan macquul aheyn in lagu fekero Barcelona oo iska iibineysa Messi, inkastoo horaantii xagaagan ay keensadeen Neymar.

Xiddiga reer Brazil ayaa heshiis 57 milyan euro ugu soo wareegay Barca, taasoo keentay in halyeeygii hore ee kooxda Johan Cruyff inuu soo jeediyo in la iska iibiyo xiddiga reer Argentina, madaama halis la gelinayo isku dhac labada xiddig ee Messi iyo Neymar.

Fabregas ayaase wararkaas daqaada ka tuuray, isagoo sheegay in joogitaanka Messi ee Barcelona inay muhim u tahay sii socoshada guulaha kooxda.

“Waa wax aan lagu fikiri karin in Messi uusan qeyb ka noqon kooxdaan” ayuu Fabregas ku sheegay wareysi uu siiyay jariirada Sport.

“Leo waa ciyaaryahanka ugu muhimsan – ma jirto cid la mid ah. Haddii aad Messi ka bixiso kooxda, waa laga yaaba inaadan wax walba waayin, laakiin qeyb weyn oo kooxdaan wax weyn ka dhigeysay ayaa dhumeysa.





“Awoodiisa shaqsiyadeed waa mid aad u weyn oo wax ku kordhisa kooxda oo dhan.”

Juventus ayaa ku dhawaaqday in Fernando Llorente uu tijaabada caafimaadka mari doono berri oo Isniin ah ka hor inta aan si rasmi ah saxaafada loogu soo bandhigin 24 saacadood ka dib.

Bianconeri ayaa bishii Janaayo shaaca ka qaaday inay heshiis la gaareen xiddiga reer Spain uu si xor ah uga soo biiro Athletic Bilbao xagaagan.

Iyadoo qandaraaskiisa kooxda reer Basque uu maanta oo 30ka June ay tahay uu dhacayo, Llorente ayaa diyaar u ah in si rasmi ah uu u noqdo ciyaaryahan Juventus ah, isagoo noqonaya xiddigii labaad ee isbuuc gudahiisa ay la saxiixato kooxda ka dib Carlos Tevez.

“28 jirkaan waxa uu ka soo degi doonaa garoonka Turin ee Caselle Isniinta xilliga duhurnimo ka hor inta uu dhameysan tijaabadiisa caafimaadka” ayaa lagu yiri warbixin la soo dhigay website-ka kooxda Horyaalka Italy.





“Shirka jaraa’id waxaa la qaban doonaa 2da July maalinta Talaadada oo uu ka dhici doono Juventus Stadium.”

Naadiga Chelsea ayaa si rasmi ah shaaca uga qaaday in ay ka kaaftoomeen illaa afar ciyaaryahan oo kooxda ka tirsanaa kuwaas oo kala ah Paulo Ferreira, Yossi Benayoun, Florent Malouda iyo goolhaye Ross Turnbull .

Warar horay u soo baxay ayaa sheegayay in afartaas laacib aysan ku jirin qorshayaasha Jose Mourinho ee xilli ciyaareedka dambe
Florent Malouda waxa uu xilli ciyaareedkii hore loo diray kooxda dhalinyarada Chelsea , waxa uuna kooxda u yimid sanadkii 2007-da isaga oo ka yimid kooxda Lyon .

Ferreira waxa uu Chelsea uu u ahaa doorashada sedexaad ee garabka midig ee kooxda waxa uuna Chelsea la soo muuqday 217-kulan isaga la qaatay kooxda 9-sano .

Halka gool haye Ross Turnbull kaliya uu Chelsea la soo muuqday 19-kulan ka dib afar sano oo kooxdaas galbeedka London ka dhisan la qaatay.

Benayoun ayaa Chelsea u yimid sanadkii 2010-kii balse waxa uu ku fashilmay in boos uu ka helo Chelsea isaga oo dhawaacyo marti u ahaa taasi oo keentay in amaah loogu diro kooxaha Arsenal iyo West Ham .

Kooxo badan oo yurub ka dhisan ayaa aad ugu loolaamaya saxiixa weeraryahanka reer Gabon iyo St Etienne ee dalka faransiiska Pierre-Emerick Aubameyang kaasi oo ay saxiixiisa doonayaan xagaagaan.

War ka baxay Channel-ka Euro Sport ee France ayaa lagu sheegay in kooxda Newcastle ay u bandhigeen kooxda St Etienne aduun gaaraya 18-milyan oo euro si saxiixa laacibkaasi u helaan .

Warar ayaa sheegaya in kooxdaas reer France ay gaashaanka u daruureen dalabka kooxda reer Ingiriis ee ay ku doonayaan xiddigaas lagu naaneyso Neymar-ka Africa ee Pierre-Emerick Aubameyang.

Sababta kooxdaas St Etienne u diidan tahay qiimaha Newcatsle ayaa sheegaya in ay u dhaw yihiin dalab gaaraya 20-milyan oo euro oo uga imaaneysa kooxda reer Russia ee FC Anzhi Makhachkala oo aad u doonaya saxiixa weeraryahankii hore ee Milan .

Waxaa xusid mudan in kooxo badan ay baacsanayaan laacibkaasi 24-sano jirka oo ay ku jiraan Tottenham , Swansea City , Monaco iyo Real Madrid.

Haatan oo Real Madrid ay heshay tababaraheeda cusub, waxa ay u jeesan doonaan isku daygooda ay ku soo xerogelin lahaayeen xiddiga Tottenham Gareth Bale.

Wargeyska The Times ayaana qoraya inay u soo bandhigi doonaan dalab ah Gonazalo Higuain iyo Fabio Coentrao iyo lacag la socota si ay u helaan xiddiga reer Wales.

Higuian ayaana ay qariib tahay in loo soo bandhigo Spurs madaama la rumeysan yahay in weeraryahanka reer Argentina uu qarka u saaran yahay inuu ku biiro kooxda Arsenal oo Tottenham ay ku xafiiltamaan waqooyiga London.

Laakiin wargeyska ayaa sheegaya in 2011dii uu Andre Villas-Boas isku dayay inuu la soo wareego Higuain, markii uu macalin ka ahaa Chelsea.

Spurs ayaa suuqa ugu jirta ugu yaraan hal weeraryahan xagaagan, sidaasi darteed haddii ay heli karaan Higuain waa mid ku haboon doonistooda, halka 25 jirka Coentrao oo Real Madrid ay 24 milyan ginni ka soo bixisay labo sanno ka hor uu u muuqdo in weli mustaqbalkiisa uu ka horeeyo.

Jariirada The Times waa ay ka gaabsatay inay sheegto lacagta la raacin doono hadii Higuain iyo Coentrao qeyb laga dhigo heshiiska, laakiin waxa ay ku celiyeen in hadii heshiiska uu sidaasi noqon in Real Madrid ay noqon doonto inay bixiyaan 85 milyan ginni oo kaash ah.
Wargeyska kale ee Daily Mirror ayaa isna sheeko la mid ah arintaan qoraya ee ku aadan in lacag iyo ciyaaryahan lagu soo bedelanayo Bale, laakiin iyagana waxa ay sheeganayaan ciyaaryahan ka duwan kuwa ay xustay The Times, waxa ay leeyihiin waa Angel di Maria.

Di Maria, waa 25 jir ay u badan tahay inuu waayi doono booskiisa koowaad ee Real Madrid hadii Bale uu yimaado, laakiin waxaa uu muteystay amaan badan intii uu xirnaa maaliyada cadaanka ah ee Madrid.

Liverpool ayaa dooneysa inay si degdeg ah wadahadalo u la yeelato xiddigeeda Luis Suarez si ay u ogaadaan hadii uu ku xadgudbay qandaraaska uu kula jiro kooxda ka dib markii ay soo baxeen warar sheegaya inuu heshiis shaqsi ah la gaaray Real Madrid.

Suarez ayaa weli la maqan xulkiisa Uruguay oo sugaya kulanka kaalinta 3aad ka dib guuldaradii xalay ka soo gaartay Brazil, laakiin wargeyska The Telegraph ee ka soo baxa Ingariiska ayaa sheegayana in Liverpool ay ku soo kacday warkii ay qortay jariirada Isbaanishka ee Marca kuwaasoo sheegay in ciyaaryahanka uu heshiis qarsoodi ah la gaaray Real Madrid.

Liverpool ayaan weli codsi in la iibiyo ah ka helin Lus Suarez kaasoo seddex sanno ay uga harsan tahay qandaraaskiisa ama dalab koox kale, laakiin waxa ay ku adkeysanayaan inuusan iib aheyn.

Laakiin waxaa lagu qasbay inay qaataan wararka soo jeedinaya inuu wadahadalo rasmi ah la galay madaxda Real, iyadoo jariirada Marca ay xiriir dhow la leedahay kooxda Los Blancos.





Inta badan sida dhacda wakiilka ciyaaryahan ayaa wadahadalo dhanka mushaharka ah la gala kooxda xiiseyneysa, waxaana ay heshiis hordhac ah la gaaraan kooxdaas ka hor inta aysan si rasmi ah u soo dalban. Laakiin si kasta ay ahaatabo Liverpool ayaa u muuqata inay talaabo dhanka sharciga qaadi doonto hadii Suarez uu ku xadgudbay qandaraaskiisa kooxda.

Zenit St Petersburg ayaa xaqiijisay inay si xor ah kula soo wareegeen Andrey Arshavin ka dib markii ay Arsenal iska fasaxday.

Weeraryahankaan ayaa xor ahaa ka dib markii Gunners ay go’aansatay inaysan qandaraaska u cusbooneysiinin, waxaana uu haatan heshiis labo sanno ah u saxiixay kooxdiisa hore Zenit.

Arshavin ayaa mustaqbalkiisa ciyaareed ka bilaabay kooxda Zenit, laakiin waxaa uu ka tagay kooxda isagoo ku biiray Arsenal 2009kii kuwaasoo ku iibsaday lacagta rikoorka u ah Gunners ee 15 milyan ginni.

Waxaana uu u saftay in ka badan 100 kulan oo Premier League ah kooxda Arsene Wenger, laakiin waxa uu ka waayay boos joogta ah sannadihii u danbeysay.

32 jirkaan ayaa amaah ku joogay kooxdiisa haatan ee Zenit qeybtii labaad ee xilli ciyaareedkii 2011-12, waxaana uu haatan si joogta ah ugu biiray kooxda uu ku soo barbaaray.

Kubadsameeyahan ayaa ku guuleystay labo horyaal iyo Uefa Cup markii uu la joogay kooxda Zenit.

Italy ayaa tijaabisay hab ciyaareed cusub oo seddex daafac ay ku ciyaarayaan iyadoo Claudio Marchisio iyo Antonio Candreva ay ka ciyaarayaan gooldhaliye Alberto Gilardino gadaashiisa.

Azzurri ayaa lagu qasbay inay bedesho taatikada ka dib markii ay dhaawacyo ku waayeen inta ka dhiman tartanka Confederations Cup Mario Balotelli iyo Ignazio Abate.

Berrito waxa ay wajihi doonaan xulka Spain semi-finalka koobka, waxaana tababare Cesare Prandelli uu uu tababarkiisii ugu horeysay ka dhigay mid ay albaabada u xiran yihiin.

Ilo ku dhow dhow La Gazzetta dello Sport ayay u suurtogashay inay arkaan tababarkii Fortaleza ka dhacay ee Azzurri, waxaana ay soo sheegeen in tababare Prandelli uu tijaabinayay qaab ciyaareedka 3-4-2-1.

Daafaca oo dhan waa wada Juve, iyadoo Gigi Buffon uu goolka ku jiro, halka Andrea Barzagli, Leonardo Bonucci iyo Giorgio Chiellini ay waardiyo ka hayaan.

Emanuele Giaccherini iyo Christian Maggio ayaa garbaha ka ciyaaraya iyadoo khadka dhexe ay ka ciyaarayaan Daniele de Rossi iyo Andrea Pirlo kuwaasoo ganaax iyo dhaawac ka soo kala laabtay.
Marchisio iyo xiddiga Lazio Candreva ayaana iyagana ka ciyaara booska ka danbeeya gooldhaliyaha Bologna Gilardino.

Waxaa jiri doona tababar kale oo Italy ay sameyn doonto saacado ka dib, iyadoo tababarkaan loo ogolaan doono inay goob joog ka noqdaan sawir qaadayaasha iyo suxufiyiinta laakiin kaliya muddo 15 daqiiqo ah.

Dad badan ayaana saadaalinaya in Azzurri ay seddex daafac kala hortagi doonto Spain, madaama ay hab ciyaareedkaas ay barbaro 1-1 ah kaga heleen Euro 2012 wareegii group-yada.