​Dhibicdii ay ka heleen Celta Vigo xalay waxey si gaabis ah ugu riixday iney horyaalka La Liga ku guuleystaan, balse sidoo kale waxey soo dhaweysay iney laba koob ku wada guuleystaan inta lagu jiro isbuuca soo aadan.
Koobka koowaad wuxuu noqon doonaa Copa del Rey, balse waa iney guul ka helaan kooxda Sevilla maadaama ay habeenka sabtida isku wajahi doonaan garoonka Wanda Metraplitano.
Balse Blaugrana waxey ku guuleysan kartaa horyaalka La Liga – hadii ay dhacaan laba arrimood oo aysan u badneyn iney dhacdo.


Marka ugu horeysa – Real Madrid iney caawa guuldaro kala kulanto kooxda Athletic Bilabo kulan ka dhici doona garoonka Estadio Santiago Bernabeu, waana natiijo xaqiijin karta in Madrid uu horyaalka xisaab ahaan kaga dhintay.
Intaas waxaa sii dheer in Barcelona ay rajeyso wixii markaas ka dambeeya in Atletico Madrid ay laba kulan oo xiriir ah guuldareysato – kulanka ay habeen dambe la ciyaari doonto Real Sociedad iyo kulanka xidga ee Real Betis.
Wey adag tahay iney sadexdaan dhacdo is raacdo si ay Barcelona isbuuca soo aadan ugu dabaal dagto laba koob, balse sidey u badan tahay horyaalka La Liga dhankeeda ayuu u dhintay.

​Weeraryahanka Paris Saint Germain Neymar Junior ayaa mar qura ka farxiyay dadka reer Brazil ee sugaya inuu soo caafimaado kadib markii uu carabka ku dhuftay waqtiga uu kasoo kabanayo dhaawaca uu la jiifo haatan ee u diiday inuu garoomada kubadda cagta ciyaaro.
Neymar wuxuu ka jabay cagta intii lagu jiray bishii February ee lasoo dhaafay, tan iyo markaas kama soo muuqan garoomada kubadda cagta, balse haatan wuxuu shaaca ka qaaday inuu soo laaban doono bartamaha bisha May.
Neymar oo ka qeyb galay bandhig ay shirkadda laga leeyahay dalka China bandhig ku saabsan qalab ay soo saarto uga sameyneysay magaalada Sao Paulo ayaa la weydiiyay waxa ku saabsan dhaawaciisa.


Neymar inkastoo uu shaaca ka qaaday waqtiga hadana walaac yar ayuu ku abuuray qof walba maadaama uu sheegay in tijaabada labaad ay wax walba ku xiran tahay lagana yaabo iney arinta sida la fiayo ka xumaato.
“Ma jiro waqti rasmi ah, tijaabadii ugu dambeysay ee aan maray, hadii aanan qaldamin – mana hubo waa 17-ka May” ayuu yiri Neymar Junior.
“Waxaa la cadeyn doonaa inaan ciyaaro. Kadib waan arki doonaa, waxey ku xiran tahay sida aan hormar u sameeyo, waxey ku xiran tahay tijaabada xigta, wali wax la go’aamiyay ma jiraan”


“Waxaan rajeynaa inaan Tv-yada ka daawan koobka Aduunka”
“Waxaan heystaa waqti fiican oo aan isugu diyaariyo, waxaan gaari doonaa halkaas anigoo sidii hore ka fiican”

Halyeeygii hore Brazil Ronaldo de Assis Moreira “Ronaldinho Gaúcho” ayaa booqasho ku yimid dalka Ethiopia oo daris la ah Somalia, waxeyna sababtu tahay inuu ka mid ahaa wafdigii ay shirkadda Heineken u xil saartay ine soo wareejiyaan koobka UEFA Champions League oo maraya heerarkiisii ugu dambeeyay.
Wasiirka arrimaha dibadda ee dalka Ethiopia Dr. Workneh Gebeyehu ayaa xafiiskiisa kusoo dhaweeyay xidigii hore Barcelona kaas oo sidoo kale soo dhaweyn aan caadi aheyn ka helay dadka reer Ethiopia ee aadka u jecel ciyaaraha.
Dr. Workneh wuxuu u sheegay Ronaldinho in diblomaasiyadda ciyaaraha ay hadda tahay midda ugu muhiimsan waqtigaan casriga ah.


Sidoo kale wuxuu carabka ku adkeeyay in ciyaaraha ay tahay kaliya mihnadda qura ee isku soo jiidda dad kala midab, jinsi iyo diin duwan – isla markaana ay tahay mihnad hormartay oo aduunka looga shaqeysto.
Dr Workneh oo faaninaya halyeeyada orodka looga haray ee dalkiisa sidoo kalana inyar tilmaamaya in Brazil ay tahay dadka kubadda cagta laga soo gaaray wuxuu yiri: “Brazil waa hoyga halyeeyada kubadda cagta, halka Ethiopia lagu garanayo iney hoy u tahay halyeeyada orodka dheer”


Si kastaba ha ahaateen Ronaldinho Caucho ayaa si weyn loogu soo dhaweeyay garoonka National Stadium halkaas oo kulan yar loogu sameynayay soo dhaweynta koobka horyaalada yurub.

​Xilli ay qaybtii hore ee ciyaartu dhamaatay xiddiguhuna galeen qolka Labiska Muuqaalka garsooraha caawiya ee VAR ayaa rikoore ku abaal mariyay koox kulan ka tirsanaa horyaalka Germany.
Kulanka ayaa u dhexeeyay kooxaha Mainz iyo Freiburg kulan ka tirsanaa horyaalka Bundesliga kaas oo la ciyaaray xalay oo Isniin ahayd.
Kulanka ayaa ahaa mid muhiim ah maadama ay labada kooxoodba u dagaalamayeen sidii ay uga sii mid ahaan lahaayeen horyaalka xilli ciyaareedka dambe.
Xiddigaha kooxda Freiburg ayaa ka dareeray garoonka si la mid ah kuwa Mainz laakiin garsooraha oo aan wali bixin ayaa loo sheegay in gacanta lagu qabtay kubada isaga  caawin ka helaya VAR
Garsooraha ayaan dib ugu yeedhay xiddigaha labada kooxood oo qolka labiska galay isaga oo sidaas ku dhigay rikoorada kooxda Mainz

​Kadib markii uu xilli ciyaareed fashil ah oo lagu cambareeyay la qaatay Manchester City – hadda wuxuu sameeyay wax cajiib ah maadaama uu laba koob u qaaday, midka ugu weyn uguna muhiimsan waa inuu horyaalka ka dhex qaaday Jose Mourinho, Antonio Conte, Jurgen Klopp & Arsene Wenger.
“Waa mid ka mi ah guulahii ugu fiicnaa  ilaa iyo hadda” ayuu yiri Pep ka hor inta aysan wiilashiisa xaqiijin axaddii hanashada horyaalka. “Horyaalkii ugu horeeyay ee Barcelona wuxuu ahaa riyo ii rumowday inaan Man United ka qaado Champions League waxey aheyd wax fiican, gaar ahaan sida aan u ciyaarnay” ayuu yiri mar kale.
Inuu hantay labada koob ee Carabao Cup iyo Premier League, waxey guud ahaan tirada koobabka uu hantay ka dhigtay 23 tan iyo markii uu bilaabay shaqadaan sanadkii 2008, waa tirada ugu badan oo uu shaqi sameeyo, kaliya Lauren Blanc ayaa kusoo dhaw oo 15-koob ku guuleystay tan iyo waqtigaas.


Macalimiinta Guulaha ugu badan gaaray 10-kii sano ee lasoo dhaafay:
1. Pep Guardiola (Barcelona, Bayern & City): 23
2. Laurent Blanc (Bordeaux & PSG): 15
3. Jose Mourinho (Chelsea, Inter, Real Madrid & United): 13
4. Carlo Ancelotti (Milan, Chelsea, PSG, Real Madrid & Bayern): 11
5. Luis Enrique (Barcelona): 9
6. Unai Emery (Sevilla & PSG): 9
7. Alex Ferguson (United): 9
8. Max Allegri (Milan & Juventus): 9
9. Zinedine Zidane (Real Madrid): 8
10. Arsene Wenger (Arsenal): 6
11. Antonio Conte (Juventus & Chelsea): 6
12. Diego Simeone (River Plate & Atletico): 6


Pep Guardiola wuxuu ku guuleystay 57% koobabkii uu u tartamay maadama uu hantay 23 ka mid ah 41 tartan oo uu hardan dheer u galay tan iyo bilowgiisii shaqadaan.
Marka laga hadlo sheekada kulamada, xidigii hore Barcelona wuxuu leyliyay kooxahii kala duwanaa 516 kulan isagoo guul gaaray 378 ka mid ah, waana qiimeyn dhan 73.25%.
Sidoo kalana wuxuu helayaa tixgelin gaar ah maadama uu guulaha ku gaaray sadex ka mid ah horyaalada ugu waaweyn yurub, taasoo khibrad kale u ah.
Guardiola markii uu koob la’aanta dhameystay xilli ciyaareedkii hore wuxuu yiri: “hadii aanan koobab ku guuleysan wax badan halkaan ma joogi doono, balse haatan waxey u muuqataa wax adan in la saadaaliyo muddo iney City xukunto England”
Sidoo kale Pep Guardiola sanadkiisii ugu horeeyay ee Barcelona wuxuu hantay sadexley koobab ah, walow uu isku dayay inuu qaabkiisii halkaas usoo raro England, hadana wuxuu ku muteystay dhaleeceyn badan.


Mudada uu tababaraha u ahaa Barcelona wuxuu kula guuleystay: 3 La Liga, 2 Copa del Rey, 3 Supercoppa de Espana, 2 Champions League, 2 UEFA Super Cup iyo 2 FIFA Club World Cup.
Markuu yimid Bundesliga iyo Bayern Munich wuxuu la hantay: 3 Bundesliga, 2 German Cup, 1 UEFA Super Cup, 1 FIFA Club World Cup, balse nasiib xumo mudadii sadexda sano aheyd ee uu joogay Bayern kuma hogaamin wax ka badan Semi Final inuu dhaafiyo Champions League.
Kaliya Carlo Ancelotti iyo Jose Mourinho ayaa si la mid ah isaga hantay horyaalada sadex ka mid ah shanta horyaal ee ugu waaweyn yurub, Guardiola kaliya laba sano ayuu ku guuldareystay inuu horyaal hanto

​Garsooraha reer England Michael Olivier ayaa dhexda ka galay mowjad muran ah kadib markii uu rigoore ka dhigay Juventus kulan ay guul ka heleen Real Madrid balse ay isaga hareen tartanka Champions League.
Bianconerri oo sadex gool kasoo laabatay ayuu garsoraha da’da yar ka dhigay rigoore waqtigii dhimashada kadib markii Benatia uu qalad ku galay Vazquez, muran badan ayaa laga keenay go’aankiisa waxeyna gaartay heer aflagaado loo geysto isaga iyo xaaskiisa.
Xiriirka qaaradda yurub ee UEFA ayaa u muujiyay iney garab taagan yahiin Olivier, waxeyna ka dhawaajiyeen iney cambaareynayaan dhibaato walba oo gudaha iyo banaanka garoonka loogu geystay Michael Olivier.


“Waan la xiriirnay si aan taageero ugu muujino, waxaan kalsooni ku qabnaa in saraakiisha qaabilsan ay talaabo ka qaadi doonaan dadka sida aan habooneyn ula dhaqmay intii uu ku jiray garoonka iyo baraha bulshadaba” ayuu yiri afhayeen u hadlay UEFA oo la hadlayay BBC Sport.
“Si xoog leh ayaan u cambaareyneynaa ficilada ay sameeyeen”
Booliska Ingiriiska ayaa bilaabay baaritaanno kadib markii Lucy Olivier ay heshay tiro aflagaado ah oo loo mariyay barta twitter-ka sida ay baahisay BBC.
Sidoo kale dhawr fariimo hanjabaado ah ayaa taeefoonkeeda gaarka ah ugu soo dhaca, kadib markii ay ciyaarta dhamaatay.

​Barcelona ayaa maanka ku heysa iney hal gacan ku qabsan karto hanashada horyaalka La Liga hadii ay caawa guul ka gaarto kooxda Celta Vigo oo ay marti u tahay, wuxuuna kulankaan kasoo horeeyaa ciyaarta kama dambeysta Copa Del Rey oo ay isbuuca soo aadan ciyaari doonaan.
Balaugrana waxey caawa ka fogaan kartaa Atletico 14-dhibcood iyadoo kaliya 5-kulan uu dhankeeda u haray, balse wiilasha Simeone waxey ciyaari doonaan khamiista, iyadoo la ogaan doona markaas fogaanta ay kooxda reer Catalonia u jirto hanashada horyaalka.
Lionel Messi ayaan ka mid aheyn ciyaartoyda la nasiyay kulanka caawa, wuxuuna isha ku hayaa inuu sii dheereysto rikoorkiisa gooldhalinta horyaalka iyo sidoo kale inuu Salah kala wareego hogaanka tartanka loogu jiro Golden Shoe.


Warbixinta Kulanka:Kulanka: Celta Vigo vs Barcelona
Tartanka: La Liga
Garoonka Balaidos
Saacadda: 10:00 Habeenimo (XGA)
Garsoore: David Fernandez (Spain)
Maxaa Ka Cusub Labada Kooxood?Celta Vigo waxey ganaax ku weyneysaa Hugo Mallo iyo Pablo Hernandez, taasna waxey ka dhigan tahay in Nemanja Radoja uu dhexda lamaan kula noqon doono Stanislav Lobotka. Sidoo kalana Facundo Roncaglia ayaa buuxin doona booska Hugo Mallo.
Barcelona waxaa dhaawac uga maqnaan doona Rakitic oo farta uu jab yar kasoo gaaray – si uu kulanka final-ka Copa del Rey u ciyaari nasiino ayaa la siiyay, sidoo kalana Pique, Iniesta iyo Busquets ayaa laga saaray safka kooxda ee caawa.
Shaxda Macquulka Ah:Barcelona (4-4-2): Ter Stegen; Semedo, Mina, Umtiti, Digne; Vidal, Paulinho, Gomes, Coutinho; Dembélé, Messi
Celta Vigo (4-4-2): Álvarez; Roncaglia, Cabral, Gómez, Jonny; Wass, Radoja, Lobotka, Sisto; Gómez, Aspas
Xaqiiqooyinka Kulanka:Barcelona ayaan wax guuldaro ah la kulmin afartii kulan ee ugu dambeysay oo ay tartamada rasmiga ah la ciyaartay Celta Vigo – 2-guul iyo 2-barbaro.
Barcelona ugu yaraan hal gool ayey ku dhalineysay Balaidos sideedii kulan ee ugu dambeysay.

​Garoonka La Rosaleda ma iloobi doono Zinedine Zidane maadaama uu ku helay guushii 100-aad ee waayahiisa tababaranimo dhamaan tartamada oo dhan mudadiisa kooxda Real Madrid.
Macalinka da’da yar ee reer France wuxuu noqday boqoley ahaan guulaha la gaaro kan ugu fiican ee soo mara taariikhda kooxda boqortooyada 100-ka kulan ee ugu horeeya isagoo ku garaacay macalin walba oo kooxda soo maray.
Zidane wuxuu gaaray 66-guulood, 15-barbaro iyo 9-guuldaro isagoo leyliyay kulamada La Liga 90-kulan kooxdiisa.


Dhanka kale 20-guulood ayuu gaaray 30-kulan oo uu kooxda hogaamiyay koobka UEFA Champions League waxaana u dheeri ah 6-guuldaro iyo 4-barbaro, lix guul, 4-barbaro iyo 2-guuldaro ayuu sidoo kale ka helay koobka boqorka Copa del Rey – taasoo ka dhigan in 50% uu ka helay natiijo ahaan.
Koobka kooxaha Aduunka wuxuu helay 4-guulood taasoo u sahashay inuu laba koob ku helo halka Sidoo kalana 4-kulan ayuu ciyaaray Spanish Super Cup balse kaliya wuxuu ku helay hal koob.


Kaliya Jose Mourinho ayaa kusoo dhaw oo helay 71.9% kulamadii uu maamulay Real Madrid – 178-jeer ayuu hogaamiyay wuxuuna helay natiijo dhan 128-guulood.
Halyeeygii hore Portugal Miguel Munoz kaas oo ah macalinka ugu mudada dheer Los Blancos ayaa helay 59.1% maadama uu hogaamiyay kooxda 602 kulan, guulna siiyay 356-jeer.
Vicente del Bosque isna ma foga wuxuu helay 54.5%.
Dhinaca kale Leo Beenhakker ayaa isna helay 61.9%, halka Luis Molowny isna uu helay boqoley dhan 56%.

Paris Saint Germain ayaa xaqiijisay iney ku guuleysatay horyaalka France kadib markii ay nus darsan goolal ka badan ku xasuuqday kooxda kusoo xigta ee As Monaco, ciyaar ka dhacday garoonka Parc des Princess.
Unai Emery iyo wiilashiisa ayaa hubanti ka dhigay ineysan ka walwalin horyaalka shan kulan iyadoo ay ka harsan tahay maadaama ay hadda 17-dhibcood ka sareeyaan Monaco oo ah kooxdii hanatay horyaalka 2015/2016.
Giovani Lo Celso iyo Angel Di Maria ayaa min laba jeer shabaqa soo taabtay halka Julian Draxler iyo Cavani ay laba gool kale raacsadeen, goolka kalana waxaa shabaqiisa ku leexiyay Radamel Falcao oo ah hogaamiyaha kooxda Monaco.


Paris Saint Germain waxey si naxariis darro ah ula ciyaartay Monaco iyadoo ay si waalli ah ugu dabaal dageen qolka labiska, Thiago Silva iyo Dani Alves ayaana hogaaminayay ciyaartoyda ku dabaal dagtay qolka, walow ciyaartoyda Monaco ay ku sugnaayeen qolkooda labiska.
Kooxda ka dhisan caasimadda markii 7-aad ayey hantisay horyaalka dalkeeda, waxeyna dib usoo ceshatay kaalinteedii maadaama xilli ciyaareedkii hore laga dhex galay markii ay u dabaal dagtay kooxda As Monaco.

Tababare Jose Mourinho ayaa ugu hambalyeeyay Man City iney ku guuleysteen Premier League balse uga digay fasal ciyaareedka dambe iney sheekada sidaan ka adkaan doonto oo ay dagaal adag gali doonaan.
Red Devils ayaa la kulantay guuldaro lama filaan ah oo kaga timid West Brom kulan ka dhacay garoonka Old Trafford, waxeyna taasi soo dadajisay in Manchester City ay shan kulan ka hor dhamaadka horyaalka xaqiijiso hanashada horyaalkoodii sadexaad ee Premier League.
Balse Mourinho oo sanadkiisa labaad mar walba iyo meel walba oo uu joogo horyaalka ku guueysan jiray ayaa hadda meel cidlo ah kusoo dhacay, wuxuuna Guardiola uga digay inuu tartan adag sugayo fasalka dambe.


“Ma garanayo hadii aan noqday koowaad, labaad ama sadexaad, balse waxaan leeyahay hambalyo, si waji ka waji ah ayaan sidoo kale ugu hambalyeyn doonaa markaan fursadda u helo” ayuu yiri Jose Mourinho.
“Waan ogaa dhawaan ama fogaanba iney noqon doonaan horyaalka, hadii aan joogi lahaa booskooda aad baan uga caroon lahaa hadii qof uu yiraahdo waxaad u guuleysateen guuldarada United ee West Brom”
“Wey guuleysteen sababtoo ah waa kooxda ugu fiican, kaliyana waxey lumiyeen dhibco yar” ayuu mar kale yiri Jose Mourinho.
Dhanka kale Jose Mourinho ayaa ka haday waxa dhici kara fasalka dambe iyo hadii uu aaminsan yahay shaqadiisa.


“Waan ku kalsoonahay shaqadeyda, taasi waa hubaal, maba jirto sabab aan ugu kalsoonaan waayo”
“Sideed horyaal oo sadex kamid ah ay yahiin Premier League, markii iigu dambeysay oo aan horyaalkaan hanto ma aheyn 20-sano ka hor waxey aheyd kaliya sadex sano ka hor, waana garanayaa sida loogu guueysto”